O Suenio d’o Dragón: Otiliu

Ir a descargar

Buen dia, si hue ye mierques as 11 d’o maitín, y somos en Radio La Granja, isto ha de ser….O
Suenio d’o Dragón.
Dende o vico de San José, en Zaragoza, Ciudat Prisión, más gran que l’amor a la libertat ye l’odio a
qui te l’arrebata.
Prencipiamos!!!!
American dream/ Suenio americano————-Down by law(2:37)
Mosica de fundo—Howlin’ Wolf———————–My mind is ramblin’/A mia ment ye
Bueno, ya sabes que si quiers participar u aportar bella cosa a o programa, lo puetz fer d’as siguients
trazas:
A primera, clamando a o programa en directo a nueu siet seis trenta y seis uitanta y ueito novanta y
quatro; nueu siet seis tres seis ueito ueito nueu quatro
Tamién, ninviando un mensache a o guasap almadeta osdd seis ueito nueu novanta y ueito zero seis
vinte y siet; almadeta seis ueito nueu nueu ueito zero seis dos siet.
Y, mesmo, por correu electronico, osueniododragon roba gmail.com, tot chunto y en minusclas; u si
lo prefieres, en a pachina d’o mesmo nombre de Radio Patio Facebook.
Pineapple face/Cara de pinya————————Lard(6:37)
ALLEN GINSBERG, poeta norteamericán, naixió lo 3 de Chunyo de 1926. Estudió en a
Universidat de Columbia, epoca en a quala dentra en contacto con os escritors que, chunto a ell,
serían lo nuclio d’o grupo Beat: Gregory Corso, Jack Kerouac y William Burroughs. En 1957
publica lo poema Otiliu, libro que ye censurau per obscenidat
“Otiliu”, poema d’Allen Ginsberg.
I
Veyié las millors mentes d’a mía cheneración destruyidas per la locura, fambrudas histericas
espulladas,
arrocegando-se per las carreras d’os negros en amaneixer en busca d’una colerica punchada,
hipsters con cabezas d’anchel cremando per l’antiga connexión celestial con o estrelau chenerador
d’a maquinaria nocturna,
que pobras y esperrecallaus y golinchaus y endrogaus pasoron la nueit fumando en a foscor
sobrenatural d’apartamentos d’augua freda, flotando sobre las cimas d’as ciudatz contemplando jazz,
que espulloron los suyos celebros debant d’o ciel baixo lo Ell y veyioron anchels mahometanos
bandoliando-se sobre teitos iluminaus,
que pasoron per las universidatz con radiants uellos imperturbables alucinando Arkansas y trachedia
en a luz de Blake entre los mayestros d’a guerra,
que estioron feitos fuera d’as academias per locos y per publicar odas obscenas en as finestras d’a
barustal,
que s’acorrucoron en ropa interior en cambras sin afaitar, cremando los suyos diners en papeleras y
escuitando a la Terror a traviés d’o paretón,que estioron arrestaus per las suyas barbas pubicas tornando per Laredo con un centurón de
mariguana enta Nueva York,
que minchoron fuego en hotels de pintura u bebioron trementina en Paradise Alley, muerte, u
sozmetioron los suyos torsos a un porgatorio nueit dimpués de nueit,
con suenios, con drogas, con malsuenios que dispiertan, alcol y batallo y bailes sin fin,
incomparables callizos de tremolosa boira y lampau en a mente blincando enta los polos de Canadá
y Paterson, iluminando tot l’immobil mundo d’o entretiempo,
realidatz de salons de Peyote, amaneixers de fosal d’arbol verde en o patio trasero, melopera de vin
sobre los tellaus, vicos d’escaparate de paseyos endrogaus luz de trafico de neón parpaguiant,
vibracions de sol, luna y arbol en os ruchientes atardeixers hibernals de Brooklyn, barucas de
cenisero y bondadosa luz reina d’a ment,
que s’encadenoron a los subterranios pa l’interminable viache dende Battery a lo santo Bronx en
benzedrina dica que lo rudio de ruedas y ninos los fació cayer tremolando con a boca estabornada y
trucaus yermos de celebro completament drenaus de brilo baixo la lugubre luz d’o Zoolochico,
que se fundioron tota la nueit en a submarina luz de Bickford saliban flotando y se posaban a lo
largo de tardes de biera esvaneixida en o ixagrinau Fugazzi’s, escuitando lo cluixir d’o Apocalís en
o jukebox d’hidrocheno,
que charroron sin aturar per setanta horas d’o parque a lo departamento a la tabierna a Bellevue a lo
museu a lo puent de Brooklyn,
un batallón perdiu de charraires platonicos blincando dende os barandaus de salidas d’incendio
dende finestras dende lo Empire State dende la luna,
paroliando chilando vomecando mormostiando feitos y memorias y chanadas y excitacions d’o
globo ocular y shocks d’hespitals y garcholas y guerras,
intelectos enters feitos fuera en memoria de tot per siet días y nueitz con uellos brillants, carne pa la
sinoga arrullada en o paviment,
que se funioron en a no-cosa Zen Nueva Jersey deixando un rastro d’ambiguas postals d’o Atlantic
City Hall,
sufrindo sudors orientals y cluixiu de uesos tancherins y migranyas d’a china con sintoma
d’abstinencia en un pobrament amueblau quarto de Newark,
que dondioron per astí y per astí a meyanueit en os patios de ferrocarrils preguntando-se án ir, y
s’iban, sin deixar corazons rotos,
que encendioron fumarretz en furgons furgons furgons fendo rudio a traviés d’a nieu enta granchas
solitarias en a güela nueit,
que estudioron a Plotino Poe San Juan d’a Cruz telepatía bop kabbalah perque lo cosmos
instintivament vibraba a los suyos pietz en Kansas,
que dondioron solos per las carreras de Idaho buscando anchels indios visionarios que estasen
anchels indios visionarios,
que pensoron que tant nomás yeran locos quan Baltimore refulchió en un extasis sobrenatural,
que puyoron en limosinas con o chino d’Oklahoma empentaus per la plevida de lugar luz de carrera
en a meyanueit hibernal,
que dondioron fambrudos y solitarios en Houston en busca de jazz u sexo u sopa, y siguioron a lo
brillant Espanyol pa conversar sobre America y la Eternidat, una fayena inutil y asinas s’embarcoron
enta Africa,
que desapareixioron en os volcans de Mexico deixando dezaga cosa sino la uembra de valons
vaqueros y la lava y la cenisa d’a poesía espardida en a chaminera Chicago,
que reaparixoron en a costa ueste investigando a lo F.B.I. con barba y pantalons curtos con grans
uellos pacifistas sensuals en a suya fosca piel repartindo incomprensibles folletos,
que se cremoron los brazos con fumarretz protestando per la balaguera narctica d’o tabaco d’o
Capitalismo,
que distribuyioron libelos supercomunistas en Union Square chemecando y espullando-se entre que
las sirenas d’os Alamos otilaban per ells y otilaban per la carrera Wall, y lo ferry de Staten Island
tamién otilaba,que s’espaldoron plorando en chimnasios blancos espullaus y tremolando debant d’a maquinaria
d’atros escletos,
que mosegoron detectives en o cuello y chiloron con deleite en autos de policías per no cometer
mas crimen que la suya propia salvache pederastia y intoxicación,
que otiloron de chenullos en o subterranio y yeran arrocegaus per los tellaus brandindo chenitals y
manuscritos,
que se deixoron buquir per lo cul per santos motociclistas, y chilaban de goyo,
que tetoron y estioron tetaus per ixes serafins humans, los marinos, caricias d’amor Atlantico y
Caribenyo,
que buquioron en o maitín en as tardes en roseras y en o pasto de parques publicos y ciminterios
repartindo lo suyo semen librement a qui querese venir,
que samucoron interminablement tractando de redir pero rematoron con un planto dimpués d’a
partición d’un banyo turco quan lo blanco y espullau anchel vinió pa trascruzar-los con una espada,
que perdioron los suyos efebos per las tres viellas gripias d’o destín; la fuina tuerta d’o dolar
heterosexual, la gripia tuerta que cluca lo uello difuera d’a tripa y la fuina tuerta que no fa mas que
posar-se en o suyo cul y tallar las vetas intelectuals doradas d’o telar de l’artesano,
que copuloron extaticos y insaciables con una redoma de biera un insaciable un paquet de fumarros
una vela y cayioron d’o leito, y continoron per lo suelo y per lo corredor y rematoron desganando-se
en o paretón con una visión de l’hibo supremo y echaculoron eludindo lo zaguer halito de
consciencia,
que endolzoron las toteras d’un millón de mesachas esterizando-se en o lusco, y teneban los uellos
royos en os maitins pero yeran preparaus pa endolzar l’hibo de l’amaneixer, rotilantes nalgas baixo
graners y espullaus en o ibón,
que salioron de putas per Colorado en miriadas d’autos furtaus per una nueit, N.C. heroe secreto
d’estes poemas, cardador y Adonis de Denver gronjiemo-nos con a memoria d’os suyos
innombrables floriendas de mesachas en solars vuedos y patios zagueros de restaurants, en
estabornaus asientos de cines, en cimas de montanyas, en espelungas u con opiladas cambreras en
familiars solitarios devantamientos de senaguas y especialment secretos solipsismos en banyos de
benzineras y tamién en callizos d’a ciudat natal,
que se funioron en vastas y sordidas cintas, yeran cambiaus en suenios, dispertaban en un subito
Manhattan y se devantoron en suterranos con dolors de cabeza de despiedau Tokai y horrors de
suenios de fierro d’a tercera avenida y se tambalioron enta las usinas de desemplego,
que caminoron tota la nueit con os zapatos plenos de sangre sobre las cadieras de nieu en os muelles
asperando que una puerta s’ubrise en o East River enta una cambra plena de vapor calient y opio,
que creyoron grans dramas suicidas en os mallos d’os departamentos d’o Hudson baixo lo foco azul
d’a luna entre la guerra y las suyas cabezas serán coronadas de laurelero y ixuplido,
que minchoron estofau de cordero d’a imachinación u dichirioron lo candrejo en o fangoso fondo
d’os ríos de Bowery,
que plororon debant d’o romance d’as carreras con as suyas carretz plenos de cebollas y mala
mosica,
que se posoron sobre caixas alentando en a foscor baixo lo puent y se devantoron pa construyir
clavicordios en as suyas falsas,
que tusioron en o seiseno piso de Harlem coronaus de fuego baixo lo ciel tuberclar rodiaus per
caixas naranchas de Teolochía,
que escribioron freneticos tota la nueit bandiando-se y rodando sobre sublimes encantamientos que
en l’amariello amaneixer yeran estrofas incoherents,
que cocinoron animals podrius liviano corazón piet coda borsht & tortiellas soniando con o puro
reino vechetal,
que s’arrulloron baixo cambions de carne en busca d’un uego,
que tiroron los suyos reloches dende lo teito pa emitir lo suyo voto per una eternidat difuera d’o
tiempo, & cayioron dispertadors en las suyas cabezas cada día per tot lo decenio siguient,que talloron los suyos maniquiellos tres vegadas succesivament sin exito, desistioron y estioron
forzaus a ubrir botigas d’antiguidatz an pensoron que yeran aviellindo y plororon,
que estioron cremaus vivos en os suyos innocents traches de franela en Madison Avenue entre
explosions de versos de plomo & lo encocerau martilleo d’os ferrios rechimientos d’a moda & los
gritos de nitroglicerina de maricas d’a publicidat & lo gas mostaza d’intelichents editors *siniestros,
u estioron atropellaus per los taxis embriagos d’a realidat absoluta,
que blincoron d’o puent de Brooklyn esto realment ocurrió y s’aluenyoron desconoixius y ixuplidaus
dentro d’a pantasmal boira d’os callizos de sopa y carros de bomba d’o vico Chino, ni sisquiera una
biera gratis,
que cantoron desasperaus dende las suyas finestras, cayioron per la finestra d’o metro, blincoron en
o puerco Passaic, s’acapizoron sobre negros, plororon per tota la carrera, bailoron escalzos sobre
vasos de vin rotos y discos de fonografo estricallaus de nostalchico Europeu jazz Alemán d’os anyos
30 s’acaboron lo whisky y vomecoron chemecando en o banyo sangriento, con lamentos en os suyos
sentius y la explosión de colosals chuflos de vapor,
que se lanzoron per las autopistas d’o pasau viachiando enta la garchola d’o Golgota -solitario mirar-
autos preparaus de cadagún d’ells u Encarnación de Jazz de Birmingham,
que conducioron campo travesera per 72 horas pa averiguar si yo heba teniu una visión u tu hebas
teniu una visión u ell heba teniu una visión pa conoixer la eternidat,
que viachioron a Denver, murioron en Denver, que tornaban a Denver; que veiloron per Denver y
meditoron y caminaban solos en Denver y finalment se fueron luen pa averiguar lo tiempo, y agora
Denver extranya a los suyos heroes,
que cayioron de chenullos en desasperanzadas seus rezando per la salvación de cadagún y la luz y
los peitos, dica que a l’alma se le iluminó lo cabello per un segundo,
que chocoron a traviés d’a suya ment en a garchola asperando per imposibles criminals de cabeza
dorada y l’encanto d’a realidat en os suyos corazons que cantaba dulces blues a Alcatraz,
que se retiroron a Mexico a cautivar un costumbre u a Rocky Mount enta lo tierno Buda u a Tánger
en busca de mesaches u a la Southern Pacific enta la negra locomotora u d’Harvard a Narciso a
Woodland enta la guirlandas de margalidas u a la fuesa,
que exichioron chudicios de cordura acusando a la radio d’hipnotismo y estioron abandonaus con a
suya locura y las suyas mans y un churau indeciso,
que tiroron ensalada de papas a los lectors d’a CCNY sobre dadaísmo y subsiguientment se
presientan en los escalones de piedra molar d’o manicomio con as cabezas afaitadas y un
arlequinesco discurso de suicidio, exichindo una lobotomía a l’inte,
y recibioron a cambio lo concreto vuedo d’a insulina Metrazol electricidat hidroterapia psicoterapia
terapia ocupacional ping pong y anesia,
que en una protesta sin humor vulcoron nomás una simbolica mesa de ping pong, descansando
breument en catatonia,
tornando anyos dimpués realment calvos fueras de per una peluca de sangre, y de glarimas y didos,
a la visible condenación d’o loco d’os vicos d’as locas ciudatz d’o Este,
los pudencos salons d’o Pilgrim State Rockland y Greystones, discutindo con os ecos de l’alma,
bandiando-se y rodando en a banca d’a solitut de meyanueit reinos dolmen de l’amor, suenio d’a vida
una baruca, cuerpos convertius en piedra tant pesada como la luna,
con a mai finalment fotuda , y lo zaguer fantestico libro arrullau per la finestra d’a cambra, y a la
zaguera puerta zarrada a las 4 AM y lo zaguer telefono trucau contra lo muro en protesta y lo zaguer
quarto amueblau vuedau dica la zaguera pieza de mueblería mental, un papel amariello s’endrezó
tuerto en un colgador d’arambre en o almario, y mesmo ixo imachinario, cosa sino un asperanzau
poco d’alucinación-
ah, Carl, mientres no sías a fueras de yo no voi a estar a fueras de, y agora yes realment en a total
sopa animal d’o tiempo-
y que per tanto corrió a traviés d’as cheladas carreras encenegau con una subita inspiración sobre
l’alquimia de l’uso d’a elipse lo catalogo d’o mesurador y lo plano vibrant,que sonioron y facioron obreduras encarnadas en o tiempo y lo espacio a traviés d’imachens
yuxtapuestas y atraporon a l’Arcanchel de l’alma entre 2 imachens visuals y unioron los verbos
elementals y metioron lo nombre y una pieza de consciencia blincando chuntos con una sensación
de Pater Omnipotens Aeterna Deus
pa recreyar la sintaxi y medida d’a pobra prosa humana y aturar-se frent a tu mudos y intelichents y
tremolosos de vergüenya, refusaus y manimenos confesando l’alma p’aconformar-se a lo ritmo d’o
pensamiento en a suya espullada cabeza sin fin,
lo vagabundo dement y l’anchel beat en o tiempo, desconoixiu, y manimenos escribindo aquí lo que
podría quedar per decir en o tiempo dimpués d’a muerte,
y s’alzoron re-encarnando en as pantasmals ropas d’o jazz en a uembra de chiracán dorau d’a banda
y buforon lo sufrimiento d’a ment espullada d’America per l’amor en un planto de saxofón eli eli
lamma lamma sabacthani que esterizó las ciudatz dica la zaguera radio
con l’absoluto corazón d’o poema sanguinariament rancau d’os suyos cuerpos bueno pa alimentar-se
mil anyos.
Howlin’wolves/ Lupos otiladors——————TOKYO SKA PARADISE ORCHESTRA(3:01)
II
Qué esfinche de cimento y aluminio ubrió los suyos cránios y abaló los suyos celebros y la suya
imachinación?
Moloch! Soledat! Inmundicia! Ceniseros y dolars inalcanzables! Ninos chilando baixo las escaleras!
Mesaches samucando en exercitos! Viellos plorando en os parques!
Moloch! Moloch! Baruca de Moloch! Moloch lo sin amor! Moloch mental! Moloch lo pesau chuez
d’os hombres!
Moloch la prisión incomprensible! Moloch la desalmada garchola de tibias cruciadas y congreso de
tristezas! Moloch que los suyos edificios son chudicio! Moloch la vasta piedra d’a guerra! Moloch
los encheberdius gubiernos!
Moloch que la suya ment ye maquinaria pura! Moloch que la suya sangre ye un galox de diners!
Moloch que los suyos didos son diez exercitos! Moloch que lo suyo peito ye un chenerador canibal!
Moloch que la suya orella ye una fuesa fumeyant!
Moloch que los suyos uellos son mil finestras ciegas! Moloch que los suyos grataciels se devantan
en as largas carreras como inacabables Jehovás! Moloch que las suyas fabricas soneyan y ranian en
a boira! Moloch que las suyas chamineras y antenas coronan las ciudatz!
Moloch que lo suyo amor ye aceite y piedra sin fin! Moloch que la suya alma ye electricidat y
cadieras! Moloch que la suya pobreza ye l’nespectro d’o chenio! Moloch que lo suyo destín ye una
boira de hidrocheno asexuau! Moloch que lo suyo nombre ye la ment!
Moloch en qui m’asiento solitario! Moloch en qui soneyo anchels! Dement en Moloch! Suca
batallos en Moloch! Sin amor ni hombre en Moloch!
Moloch qui dentró primerencament en a mía alma! Moloch en qui soi una consciencia sin un
cuerpo! Moloch qui m’espantó d’o mío extasis natural! Moloch a qui yo abandono! Dispierten en
Moloch! Luz chusmiando d’o ciel!
Moloch! Moloch! Departamentos robotz! Rabals invisibles! Tresorerías estransidas!
Capitals ciegas! Industrias demoniacas! Nacions espectrals! Invencibles locarios! Batallos de piedra
molar! Bombas monstruosas!
Trencoron las suyas espaldas devantando a Moloch dica lo ciel! Pavimentz, arbols, radios,
toneladas! Devantando la ciudat a lo ciel que existe y ye arredol nuestro!
Visions! Presachios! Alucinacions! Milagros! Extasis! Arrocegaus per lo río americán!
Suenios! Adoracions! Iluminacions! Relichions! Tot lo cargamento de mierda sensible!
Progresos! Sobre lo río! Chiros y crucifixions! Arrocegaus per la corrient! Epifanías!
Desasperacions! Diez anyos de chilos animals y suicidios! Mentz! Nuevos amors! Cheneración
dement! Abaixo sobre las penyas d’o tiempo!Autentica risa santa en o río! Ells lo veyioron tot! Los uellos salvaches! Los santos escacilos!
Dicioron dica agora! Blincoron d’o teito! Enta la solitut! Despedindo-se! Levando flors! Enta lo río!
Per la carrera!
Howl/ Otiliu———————-Helmet (1:04)
III
Carl Solomon! Soi con tu en Rockland
An yes mas loco d’o que yo soi
Soi con tu en Rockland
An t’has de sentir muito extranyo
Soi con tu en Rockland
An imitas la uembra d’a mía mai
Soi con tu en Rockland
An has asasinau a las tuyas dotze secretarias
Soi con tu en Rockland
An te rides d’esta humor invisible
Soi con tu en Rockland
An somos grans escritors en a mesma horrorosa maquina d’escribir
Soi con tu en Rockland
An la tuya condición s’ha tornau seria y ye reportada per la radio
Soi con tu en Rockland
An las facultatz d’a barustal no admiten mas los gusanos d’os sentius
Soi con tu en Rockland
An bebes lo té d’os peitos d’as solteras d’Utica
Soi con tu en Rockland
An te burlas d’os cuerpos d’as tuyas enfermeras las gripias d’o Bronx
Soi con tu en Rockland
An chilas en una camisa de fuerza que yes perdendo lo chuego d’o verdadero
ping pong de l’abismo
Soi con tu en Rockland
An trucas lo piano catatonico l’alma ye innocent y immortal nunca habría de
morir sin dios en una casa de locos armada
Soi con tu en Rockland
An cinquanta shocks mas no te tornarán nunca la tuya alma a lo suyo cuerpo d’o suyo
pelegrinache a una cruz en o vuedo
Soi con tu en Rockland
An acusas a los tuyos doctors de locura y planeyas la revolución socialista hebrea
contra lo Golgota nacional faixista
Soi con tu en Rockland
An ubres los ciels de Long Island y resucitas a lo tuyo Chesús humano y vivient d’a
fuesa sobrehumana
Soi con tu en Rockland
An i hai vinticinco mil camaradas locos chuntos cantando las estrofas finals de
La Internacional
Soi con tu en Rockland
An abrazamos y besamos a los Estaus Unius baixo los nuestros linzuelos los
Estaus Unius que tusen tota la nueit y no nos deixan adormir
Soi con tu en Rockland
An dispertamos electrificaus d’o coma per lo ruchir d’os aeroplans de
las nuestras propias almas sobre lo tellau ells han veniu pa lanzar bombas
anchelicals lo hespital s’ilumina a ell mesmo colapsan maruenyos imachinarios Oharguelladas lechions corren difuera Oh estrelau shock de compasión la guerra
eterna ye aquí Oh victoria ixuplida la tuya ropa interior somos libres
Soi con tu en Rockland
En os míos suenios caminas gotiando per un viache a traviés d’o mar sobre las carreteras a
traviés d’America plorando dica la puerta d’a mía cabana en a nueit d’o ueste
Sant Francisco, 1955-1956
Nota A Piet De Pachina Pa “Otiliu”
Santo! Santo! Santo! Santo! Santo! Santo! Santo! Santo! Santo! Santo! Santo! Santo! Santo! Santo!
Santo!
Lo mundo ye santo! L’alma ye santa! La piel ye santa! La nariz ye santa! La luenga y lo batallo y la
man y lo forau d’o cul son santos!
Tot ye santo! totz son santos! totz los puestos son santos! tot día ye en a eternidat! Tot hombre ye un
anchel!
Lo vago ye tant santo como lo serafín! lo dement ye tant santo como tu la mía alma yes santa!
La maquina d’escribir ye santa lo poema ye santo la voz ye santa los oyents son santos lo extasis ye
santo!
Santo Peter santo Allen santo Solomon santo Lucien santo Kerouac santo Huncke santo Burroughs
santo Cassady santos los desconoixius locos y sofrentz mendigos santos los horribles anchels
humans!
Santa la mía mai en a casa de locos! Santos los batallos d’os güelos de Kansas!
Santo lo chemecant saxofón! Santo l’apocalís d’o bop! Santas las bandas de jazz mariguana hipsters
paz peyote pipas y baterías!
Santa las solitutz d’os grataciels y pavimentz! Santas las cafeterías plenas con os millons! Santos los
misteriosos ríos de glarimas baixo las carreras!
Santo l’argonauta solitario! Santo lo vasto cordero d’a clase meya! Santos los pastors locos d’a
rebelión! Qui goya Los Angeles ye Los Angeles!
Santa New York santa Sant Francisco santa Peoria & Seattle santa París santa Tánger santa Moscú
santa Estambul!
Santo lo tiempo en a eternidat santa eternidat en o tiempo santos los reloches en o espacio la quarta
dimensión santa la cinquena Internacional santo l’anchel en Moloch!
Santo lo mar santo lo desierto santa la vía ferria santa la locomotora santas las visions santas las
alucinacions santos los miraclos santo lo globo ocular santo l’abismo!
Santo perdón! compasión! caridat! fe! Santos! Nusatros! cuerpos! sufrindo! magnanimidat!
Santa la sobrenatural extra brillant intelichent bondat d’o alma!
Berkeley, 1955
Heroin———————The Velvet Underground(7:09)
Y, por agora, iste ha estau o suenio de hue. Ya sabes que, si t’ha feito goyo, t’aspero o proximo
mierques en Radio La Granja, en o 102.1 d’a FM. Entremistanto, nos veyemos en os suenios, nos
ascuitamos en la Radio. Salut y emparo mutuo!!!!
Police on my back/ policia dezaga de yo——————- Die Toten Hosen (2:16)

Responder

Introduce tus datos o haz clic en un icono para iniciar sesión:

Logo de WordPress.com

Estás comentando usando tu cuenta de WordPress.com. Salir /  Cambiar )

Google photo

Estás comentando usando tu cuenta de Google. Salir /  Cambiar )

Imagen de Twitter

Estás comentando usando tu cuenta de Twitter. Salir /  Cambiar )

Foto de Facebook

Estás comentando usando tu cuenta de Facebook. Salir /  Cambiar )

Conectando a %s

Este sitio usa Akismet para reducir el spam. Aprende cómo se procesan los datos de tus comentarios .