O Suenio d’o Dragón: De Anarcofeminismo, con o tiempo, a historia d’a mía vida

Ir a descargar

Buen dia, si hue ye mierques as 11 d’o maitín, y somos en Radio La Granja, isto ha de ser….O Suenio d’o Dragón.
Dende o vico de San José, en Zaragoza, Ciudat Prisión, Si nos amortan la luz, encenderemos fogueras
Prencipiamos!!!!
Un sueño/ Un suenio————-2 minutos(2:33)

Mosica de fundo————Vent Libertaire/Aire libertario —————–VV.AA(2015)
Bueno, ya sabes que si quiers participar u aportar bella cosa a o programa, lo puetz fer d’as siguients trazas:

A primera, clamando a o programa en directo a nueu siet seis trenta y seis uitanta y ueito novanta y quatro; nueu siet seis tres seis ueito ueito nueu quatro

Tamién, ninviando un mensache a o guasap almadeta osdd seis ueito nueu novanta y ueito zero seis vinte y siet; almadeta seis ueito nueu nueu ueito zero seis dos siet.

Y, mesmo, por correu electronico, osueniododragon roba gmail.com, tot chunto y en minusclas; u si lo prefieres, en a pachina d’o mesmo nombre de Radio Patio Facebook.


Vivo————————Redska (5:38)

Bien, lo zaguer mierques t’estié charrando de Louise Michel y de lo suyo libro, en primera persona, sobre La Comuna de París. Qué, que encara no te l’has leyiu?. pus antes de continar charrando-te d’ell, m’aspero a que te lo leigas y, entremistanto, te voi a leyer una traducción que he feito, nomás pa los tuyos udius, d’un texto d’o Grupo Moiras sobre Anarcofeminismo que, a lo menos a yo, m’ha serviu pa aclarir muitas dubdas; aspero que a tu tamién. Astí imos…


Grupo Moiras
En a endrecera de Mullers Libres


“Totz los feminismos dolentian d’o mesmo defecto capital: la falta d’humanismo” “Feminismo? Nunca! Humanismo siempre! Propagar un feminismo ye fomentar un masculinismo, ye creyar una luita immoral y absurda entre los sexos…”. “Lo reformismo, sía femenín u masculín, creye poder apuntalar a la sociedat actual con concesions y parolas.” “Lo día en que la muller lechisle y administre, continarán las inchusticias, los privilechios, las desigualdatz, las miserias y las luitas…” Esto ye lo que pensaba Federica Montseny sobre lo feminismo en 1924 (“Feminismo y humanismo”, la Revista Blanca, p.13).
Y esto ye lo que declaraba en entrevista de 1979 (“Federica Montseny: cultura y anarquía”, per María Ruipérez, Tiempo d’historia nº 52, p.24): “Faigamos una chicota aclaración. En a epoca d’a mía mai, la parola feminismo yera quasi relegada a lo movimiento sufrachista…” “Pero en o sentiu d’emponderar los dreitos d’a muller […] la labor realizada […] estió muito important.” “Y este ye lo combate que levan estas mullers, obreras u intelectuals, que se daban cuenta que la primera coseta a obtener pa la muller no yera lo voto, yera lo dreito de disposar d’ell mesma, a no depender economicament de l’hombre. Esta ye la primera y mas important obra feminista, pero sin decir-lo, perque ellas no charraban de feminismo, pero de feito posoron los verdaders fitos d’a libertat d’a muller”.
Se puede deducir d’aquí que, encara que Mullers Libres no utilizase lo termin feminismo, per un prechudicio común a totas las anarquistas d’a epoca, de feito, ye lo que feban.
Las que aquí escribimos asumimos lo termin anarcofeminismo. Las definicions son importants. Lo termin feminismo, nos permite, per una parte, no deluye la opresión especifica d’a muller en un antipatriarcau cheneral (an dentra tamién la opresión de chenero que lo propio hombre sufre, y sufren totz los cheneros). Y nos posibilita identificar a lo feminismo como movimiento per la chusticia entre muller y hombre, no per la supremacía d’a muller u necesariament, per la competencia con l’hombre dentro d’o sistema social vichent, y situar-nos adintro. Lo mesmo que l’anarquismo ye una rama d’o socialismo, que no se barafundia ni actúa con as formas autoritarias d’o mesmo, l’anarcofeminismo lo ye d’o movimiento feminista, y tampoco fa frent con as mullers autoritarias.
En cambio, no ye una división dentro de l’anarquismo, sino una dimensión d’ell, perque ye una de las luitas que implica. L’anarquismo no ye una luita de frent solo, sía luita de clases u luita contra lo estau, sino que ye luita contra totas las hierarquías. Aquí qui refusan l’uso d’a parola entienden que quan se dicen anarquistas, esto ya lo incluye tot. Tornamos a repetir: lo que no se nombra, se silencia. Si nusatros no nos reconoixemos como anarquistas, nunca levaremos a cabo luita anarquista, y perque somos parte d’a naturaleza en evolución, sabemos que la luita anarquista nunca tendrá fin. D’a mesma traza, si no nos referimos a la dimensión feminista de la luita anarquista, si no nos definimos como feministas, nunca levaremos a la practica l’ideyal de chusticia entre sexos. Cal estar conscients d’ixa luita, clamando-la per lo suyo nombre, y si ye necesario creyando colectivos u organizacions especificas.
Dos motivos son los que levan a ixo. Primero, la necesidat d’especializar, y segundo, la urchencia d’una permanent labor de autocretica. La especificidat d’os problemas d’a choventut, la necesidat de fer un treballo especial y en profundidat en a cultura y ocio d’os chovens, levó a la creyación d’os grupos d’afinidat y dimpués la formación d’a Federación de Choventutz libertarias. Qué sentiu habría teniu haber de pasar totas las decisions per l’aprebación d’una asembleya formada per personas que, per edat, no tienen exactament las mesmas inquietutz? Espontaniament los chovens s’uniban pa socializar entre ells y promover nuevos patrons de socialización en a choventut. La suya dople militancia en Choventutz y en CNT impediba la disgregación. No deixaban de perteneixer a lo sindicato, l’organismo que les vinculaba a lo movimiento obrero anarquista. A lo mesmo tiempo que militantz d’o sindicato que no yeran chovens, yeran en estreito contacto y colaboración con os grupos de Choventutz.
La necesidat d’autocretica permanent, levó a la creyación d’a FAI, en a quala los grupos de militantz d’a CNT con mayor conscienciación ideolochica, s’unioron pa combatir las tentacions reformistas dentro de l’anarcosindicalismo espanyol. Per medio d’a propia acción ideolochica dentro d’o sindicato, no per garra dictadura interna como a ormino se criticó dende los sectors reformistas, que precisament son los que nunca hesen d’estar astí, dau lo caracter revolucionario d’a organización.
En l’orichen de Mullers Libres como organización especifica, tornan a dar-se estas motivacions. En este caso, en deseparar se tractaba de combatir lo masclismo interno, lo qual no se podeba fer dentro d’organizacions mixtas, per la persistencia d’os prechudicios d’os hombres. La diferencia especifica feba mas operativo y achil tener asembleyas aparte, y una federación de grupos a libel nacional como organización diferenciada. La militancia simultania en CNT u FAI permitiría actuar sobre ixes prechudicios mantenendo a la vegada la independencia. Pro, ixes prechudicios tamién existen en qualques companyeras mullers, pero son prechudicios formulaus dende la optica de l’hombre, que tiende a reaccionar de forma defensiva.
Vala como exponent lo debat desenvuelto en una serie d’articlos en Solidaridat Obrera en 1935, entre Mariano R. Vázquez, “Marianet”, secretario de CNT alavez, y Lucía Sánchez Saornil, que encara no heba plegau a la fundación de Mullers Libres, pero que precisament aquí desenvuelte lo que serán las suyas linias d’acción. Quan Marianet desfiende que la luita no estase deseparada perque l’obchectivo ye en primeras economico y lo mesmo, Lucía le contesta que ye patent l’escasez de mullers en o sindicato, y ixo ye per lo poco interés d’os militantz en cambiar-lo. Le recuerda asinasmesmo que en a suya mayoría son hombres, que per la suya posición d’avantalla, tienden a asumir la subordinación moral asociada a la función economica destinada a la muller. Frent a esto, la muller heba d’estar persona debant de tot, no reducir-se a una función, tradicionalment la de “mai-reproductora-duenya de casa”. La división d’o treballo en clases socials no ye lo mesmo que la división sexual d’o treballo. Las mullers heban de luitar contra totas dos cosetas expresando-se en os suyos propios termins. No sin la colaboración d’os hombres, advertiba Lucía. Perque la respuesta de Marianet en os suyos zaguers articlos d’a serie estió que la muller yera igualment culpable d’a inchusticia per no reclamar los suyos dreitos y que s’autoemancipase sola como lo proletario d’o patrón. Y a esto tenió ella que precisar que l’analochía no ye exacta, ya que los intereses d’a muller no se contraponen a los de l’hombre, que nomás per lo que fa a privilechios ye l’hombre lo patrón d’a muller, y si bien ye humano lo querer conservar-los, no ye pro, anarquista.

L’anarchie vaincrà/ L’anarquía vencerá—————Les amis de ta femme( 3:23)


Ye amás muito significativo lo feito que la primera vegada que Mullers Libres estió clamada a una reunión d’o Movimiento Libertario estase lo 24 de chinero de 1939 ,quan ya se yera evaquando Barcelona (p.25 “Mullers libres”, M. Ackelsberg, ed. Virus). En octubre d’o 38, la delegación de Mullers que heba partiu d’Alicant en barco y a causa d’os bombardeyos faxistas heba plegau dos días dimpués de l’inicio d’o Pleno Nacional de rechionals d’o ML, acotolada y fambruda, no estió reconoixida (testimonio de Pura Pérez Arcos, p.25 op.cit). La propuesta d’acceptación de Mullers Libres como quarta rama d’o movimiento, partió d’as mullers que actuoron dende las atras organizacions. La situación belica per lo visto impidió que plegase a votar-se en as asembleyas locals. Pero lo que sí sabemos, ye que una dimpués d’unatra, las delegacions a pleno expresoron la suya negativa a ixa reconoixencia esgrimindo estas razons: que l’anarquismo no admite diferencias de sexo; que ixe treballo heba d’estar levau a cabo per los sindicatos, y que Mullers libres habría de funcionar como sección de sindicatos y ateneus. Ye decir, que lo que no s’heba pediu a Choventutz y Fai, se le exichiba a Mullers Libres.
Una coseta la distinguiba clarament d’as atras dos organizacions y ye talment per ixo que costase mas la suya reconoixencia: Mullers Libres, como creyación anarcofeminista, se sitúa en a intersección de dos movimientos. Perteneixe a l’anarquismo, y a la vegada perteneixe a la luita de totas las mullers per emancipar-se, y igualment s’integra en a historia d’o feminismo. La suya naturaleza ye semellant a la de l’ecolochismo y antifaixismo anarquistas, que ya per ixe *matiz se distinguen de totz os de demás, encara compartindo obchectivo especifico d’ixes movimientos. Son luitas u movimientos dentro d’o movimiento, con obchectivos integraus en un común: eliminación de tota forma d’explotación y dominio.
S’han resaltau dica aquí prechudicios que son persistents, carencias, y necesidatz d’o ret d’organizacions d’o movimiento libertario, hue en día muito maltreita. Y s’ha dito que l’anarquismo no ye una luita de frent solo. Agora bien, l’anarcosindicalismo, como luita obrera organizada contra lo capitalismo, ye lo que historicament ha vertebrau tota la luita. Y asinas l’entendioron Mullers Libres, que no yeran “comunalistas frent a sindicalistas” como pueden pretender mistificacions posteriors. No se daba ixa contraposición perque la comuna ye la celula politico-economica en una sociedat libertaria, no lo sindicato. Y per la suya parte lo sindicato no se reduciba a lo centro de treballo, sino que admitiba y admite formas d’acción en os de demás ambitos d’a vida social (acción social, cultural, autochestionaria, a libel de vico, taller, casa…), igual que suposa la cooperación con as atras organizacions d’o movimiento surtidas d’a especificidat y la especialización.
Esto suposa enfoque comunitario en tot lo movimiento. Ye mas: l’exito d’o sindicato como ferramienta revolucionaria depende d’a capacidat d’a suya militancia de conservar ixa perspectiva integral, d’ir dillá d’o centro de treballo. Y d’a mesma traza, no habría d’atribuyir-se a Mullers Libres un distanciamiento d’a filosofía socialista matriquera de l’anarquismo. L’economico ye fundamental en o suyo esquema d’o cambio, pero no en un sentiu vulgar, productivista, u reformista. L’analisi d’a opresión femenina que facioron las anarquistas yera muito fino. De feito, s’abanzó a la critica d’as institucions patriarcals feita per lo feminismo d’a segunda ola y posteriors, y mesmo a l’analisi d’a subordinación psicolochica femenina que se ye fendo a fondo actualment en o sieglo XXI. Pero pa ellas lo fenomeno psicolochico y lo socioeconomico yeran interrelacionaus. La muller heba de cautivar la suya autonomía personal, lo suyo creiximiento interno, a pur d’un activismo endrezau a subvertir lo reparto de funcions tradicional. Como muller y como persona d’a clase treballadera, heba d’asumir la destrucción d’a base material que permite la reproducción de totas las hierarquías. Tota acción s’endrezaba a lo cambio interno, y s’endrezaba a esto. Lochicament, esta visión integral d’o cambio, en sentiu ecolochico d’a economía, incluyindo las relacions con un mesmo y con l’atro, chocaba con os intereses a curto plazo desfendius per lo feminismo burchés u per las organizacions obreras autoritarias. Pa estas, la emancipación yera en a encorporación d’a muller a la fabrica, en o cobro d’igual salario, en a participación d’a muller en o esfuerzo de guerra… la suya liberación multidimensional, como persona, no s’abordaba.
Hue ye estallando la situación de pasividat creyada a partir d’a institucionalización d’o movimiento feminista. L’abance d’o masclismo neoliberal ha devantau una ola de violencia sobre la muller frent a la quala cal desfender-se con solucions que lo feminismo autoritario no nos va a aportar, estando involucrau como ye, en as institucions capitalistas. No podemos eludir l’autodefinición anarquista, como se fació antes d’a guerra en a revista Mullers Libres. I hai tal proliferación de feminismos (y d’anarquismos, tamién), que se fa preciso, agora mas que nunca, diferenciar quí ye quí pa no cayer en trapas reformistas. Cal empentar la formación tanto d’os d’adintro como d’os de difuera d’o movimiento.
Contamos amás con a immensa suerte de vivir en un tiempo en que la luita d’as personas con orientación sexual u chenero diferent a lo tradicional, ha adquiriu un fuerte desembolique y tamién parte d’ella se ye integrando en o movimiento anarquista. L’anarcofeminismo puede enriquir-se enormement con l’aportación dende esta luita, que afecta a las nocions tradicionals de femenín y masculín. Talment, sobre tot ye la perspectiva d’a muller transexual la que nos puede servir mas en a redefinición d’a identidat muller. En a busqueda de conoixencia d’a realidat muller, amenestemos saber si i hai una diferencia real, y en qué consiste. Esta ye una avantalla con a quala no contaban las antigas militantz de Mullers Libres, y que pensamos que no cal desaproveitar.
En definitiva, avogamos per la recuperación d’a federación de grupos d’a organización Mullers libres, sobre las suyas mesmas bases, que son las que reflectamos en os prencipios que aconforman la nuestra linia editorial, pero con actualizacions no desalcordes con ells. Moiras y Madeja queresen estar contribución a ixa recuperación.
Per la liberación d’a muller y per la Humanidat libre! Salut y anarcofeminismo! Grupo Moiras


Les anarchistes————————Léo Ferré (3:09)




La vida de Léo Ferré (1916-1993) ye sinyalada per qualques paradoxas. Lo destín querió que a l’autor de Ni Dieu ni maître (ni dios, ni amo) la muerte le sobreveniés lo día d’a fiesta nacional francesa, un 14 de chulio de 1993, en o paisache d’a Toscana italiana an s’heba refuchiau feba anyos. Y la suya naixencia tenió puesto en un escenario d’opereta, lo Prencipau de Múnegu, an lo suyo pai treballaba como director de personal d’a Societé de Bains de Mer, que controlaba lo casino y atros negocios d’o país.

En una Europa que se desangraba, Ferré creixió en un ambient familiar marcau per la radiz italiana d’a suya mai y la presencia d’o mar. Como escribe en a presentación d’o libro Chansons des quatre saisons (Seghers, 1967) d’o suyo amigo y colaborador, Jean-Roger Caussimon, “las primeras imachens d’a infancia son lo cine d’a nuestra vida”. En a suya, lo mar ye un paisache intimo y familiar; dimpués, creativo. Lo Mediterranio, primero, y mas tarde l’Atlantico estioron fundamentals en o suyo treballo, como lo sería lo paisache d’a Bretanya sinyalau per ixa obra mayestra, La Memòire et la mer, piedra de toque pa tot practicant de l’oficio de cantautor.

Las primeras cancions d’a suya autoría mereixen l’atención d’o “patriarca” d’a chanson, Charles Trenet, encara que desapreba la suya voz. Muito mas favorable estió lo chudicio de Édith Piaf que gravó un d’os suyos temas, Les amants de Paris.

En aquella capital en posguerra de postal existencialista, Ferré recorrió sin exito la endrecera de tot cantaire rive gauche. Actuaba en cabarets como Boeuf sud le toit u Milord l’Arsouille. Gracias a Catherine Sauvage, una especie d’alma meya, las suyas cancions prencipioron a plegar a lo publico. Y entre ellas, Paris Canaille, refusada per Yves Montand, que acabaría convertindo-se en himno en a voz de Juliette Gréco.

En a canción francesa de posguerra, Brassens y Ferré encarnoron a los dos grans “anarquistas” d’a chanson. Entre que lo primero destilaba una especie de serenidat en o suyo ideyario, Ferré destacó per lo suyo canto colerico y pleno de rabia. Representó l’artista compromeso que cantaba pa los exiliaus republicans espanyols u participaba en conciertos a favor d’a Federación Anarquista. Lo suyo compromiso con a luita antifranquista quedó reflectau en cancions como Franco la muerte, a resultas d’a execución d’o dirichent d’o PCE Julian Grimau.

En 1990, Ferré publicó lo suyo zaguer album, Les vieux copains. Dezaga deixaba una obra musical y poetica que liberó a la canción d’a suya pretadera de tres menutos. Mescló con mayestría poesía y argot; popularizó las voces de poetas como Baudelaire, Verlaine, Rimbaud u Aragon y colaboró con grupos de rock u formacions orquestals.

A un sieglo d’a suya naixencia, l’herencio de Ferré, mescla indestructible de “amor y anarquía” como lo titol d’un d’os suyos mas bellos albumes, ye reivindicada per las nuevas cheneracions de cantaires franceses. Cancions como C’est extra u Avec le temps s’han convertiu en clasicos compartius per artistas tant diversos como Dalida, Alain Bashung u Jane Birkin. Dica Serge Gainsbourg lo sinyaló: “Gracias a Léo Ferré y Boris Vian entendié que se podeban decir muitas cosetas en unas pocas estrofas”.

Pa muestra, un botón:


Avec le temps/Con o tiempo

Con o tiempo
Con o tiempo, desapareixe, tot desapareixe.
S’ixuplida la cara y s’ixuplida la voz.
Lo corazón, quan ya no traquia, no vale la pena ir
a buscar mas luen, has de deixar-lo pasar y ixo ye muito bien.

Con o tiempo
Con o tiempo, desapareixe, tot desapareixe.
L’atro que amamos, a qui buscabanos baixo la plevida.
L’atro que s’endevinaba con o esbarro d’una mirada.
Entre las parolas, entre las linias y baixo lo rubor,
con un churamento atrapaciau que desapareixe per la nueit,
con o tiempo, tot se funeix.


Con o tiempo
Con o tiempo, desapareixe, tot desapareixe.
Mesmo las millors memorias, qué cara levas, farfallo
en la galería, buscando entre los rayos d’a muerte,
lo sabado per la nueit, quan la ternura desapareixe per ell sola.


Con o tiempo
Con o tiempo, desapareixe, tot desapareixe.
L’atro, a qui creyebanos per un ron, per cosa.
L’atro, a lo qual dabanos aire y alfayas,
per qui un habría vendiu la suya alma per unas monedas,
debant d’o qual nos arrocegabanos como s’arrociegan los cans.
Con o tiempo, desapareixe, tot desapareixe.

Con o tiempo
Con o tiempo, desapareixe, tot desapareixe.
S’ixuplidan las pasions y las voces,
que te mormostian , d’a pobra chent,
no tornes muito tarde; sobre tot, no pilles fredo.

Con o tiempo
Con o tiempo, desapareixe, tot desapareixe.
Y te sientes tant canoso como un caballo tronzau.
Y te sientes conchelau en un leito d’azar.
Y te sientes nomás, talment, pero tranquilo.
Y te sientes enganyau per los anyos perdius, asinas que, realment,
con o tiempo, ya no le amas.

Avec le temps————Léo Ferré (4:25)

Les chant des partisans——————-Troïka (2:43)

Y ya pa finalizar:


Story of my Life – Social Distortion
Story of my Life ye una canción d’o grupo de punk rock estaunidense Social Distortion. Amaneixe en o suyo tercer album, Social Distortion, editau en 1990.

La historia d’a mía vida


L’instituto pareixeba un borrón
no teneba muito interés per los esportes u las eslecions escolars
y en clase soniaba tot lo día
con un cabo de semana de rocanrol
Y la moceta en a parte de debant d’a clase
tant cerca y tant luen, sabes, nunca pareixió dar-se cuenta
que este inamoramiento fato d’un escolar
no yera solo finchiu
La vida pasa muito rapido
nomás quiers fer lo que creyes que ye bien
zarras los uellos y ye lo pasau;
la historia d’a mía vida.

Y torné a lo mío antigo vecindau
las caras han cambiau, ni queda dengún con qui charrar
y la sala de billars que m’encantaba de nino
agora ye un ultramarín
Estié a lo centro a buscar treballo
no teneba formación, ni garra experiencia
miré los foraus d’os míos vaquers
die meya tornada y torné per an heba veniu
La vida pasa muito rapido
nomás quiers fer lo que creyes que ye bien
zarras los uellos y ye lo pasau;
la historia d’a mía vida.

Y los buens tiempos vienen y van
nomás deseyo que los buens tiempos duren una micarrona mas
y pienso en os buens tiempos que pasamos
y per qué habioron d’acabar
Me siento en o canto d’o leito
rasguio la mía guitarra y canto una canción d’amor de bandolers
mientres pienso en qué serás fendo agora
y en quán vas a tornar.
La vida pasa muito rapido
nomás quiers fer lo que creyes que ye bien
zarras los uellos y ye lo pasau;
la historia d’a mía vida.

Story of my life/historia d’a mía vida———————Social Distortion (5:48)



Y, por agora, iste ha estau o suenio de hue. Ya sabes que, si t’ha feito goyo, t’aspero o proximo mierques en Radio La Granja, en o 102.1 d’a FM. Entremistanto, nos veyemos en os suenios, nos ascuitamos en la Radio. Salut y emparo mutuo!!!!

Cheers theme(punk cover)——————-Lagwagon (1:50)

Deja una respuesta

Introduce tus datos o haz clic en un icono para iniciar sesión:

Logo de WordPress.com

Estás comentando usando tu cuenta de WordPress.com. Salir /  Cambiar )

Imagen de Twitter

Estás comentando usando tu cuenta de Twitter. Salir /  Cambiar )

Foto de Facebook

Estás comentando usando tu cuenta de Facebook. Salir /  Cambiar )

Conectando a %s

Este sitio usa Akismet para reducir el spam. Aprende cómo se procesan los datos de tus comentarios.