O Suenio d’o Dragón: Carrerons de Puta Guerra

Ir a descargar

Cabecera———————————-(1:56)
Buen dia, si hue ye mierques as 11 d’o maitín, y somos en Radio La Granja, isto ha de ser….O Suenio d’o Dragón.
Dende o vico de San José, en Zaragoza, Ciudat Prisión, pretando-le fuego a la reyalidat!!!!
Prencipiamos!!!!

Die toten Hosen.- Sommernachtstraum/ Suenio d’una nueit de verano (1:44)

Mosica de fundo————–Paco de Lucía———-Rumbas.

Buen día amigos,

Hue tos hemos de charrar d’un prochecto que somos levando a cabo con muita ilusión: UN CALANDARIO DE 2021!!

De seguras que belún de vusatros tos preguntatz por qué un calandario si agora totz lo levamos en o mobil y quasi no s’usan, si en istas calendatas totz fan calandarios,…, pus porque no va a estar un calandario qualsiquiera, vas a tener arte y radio penchaus en a tuya paret. Amás, a nusatros nos ye servindo pa empecipiar a mirar enta debant y intentar ixuplidar-nos d’iste horrible 2020 que se ye levando por debant masiadas cosetas.

Hemos contau con 13 buens amigos que se dedican a la fotografía, a dibuixar, a pintar… y les pedimos una obra pa ilustrar un mes d’o calandario y, amás, que si o tema podeba chirar arredol d’a radio millor que millor. Nos han feito plegar cosetas realment emocionants, pero d’ixo se tracta l’arte, no?.

Queretz saber quí participan? Aquí van os suyos nombres: Sara Bea, Barbara Abyss, Ita Rasquin, Gaudi Ramone, Vázquez, María Puñales, Furillo, Jorge Rueda, Carlos Canales, Jorge Valero, Carlos Colás y Begoña Simón. Si os cuentas veyerás que falta un, a portiada, pero ixo nos l’alzamos dica o momento en o qual o calandario sía en a carrera.

O formato d’o calandario será tipo revista pa que pasau o mes, si t’ha feito goyo a ilustración, la desepares y puedas usar-la pa enmarcar-la, pa forrar a carpeta d’o insti (si encara se fa ixo) u o que quieras.

Si no quiers quedar-te sin a tuya copia puetz fer una preorder u encargo dica o 22 de noviembre y te l’entregaremos pasada ixa calendata. Amás yes aduyando-nos para poder pagar a impresión.

En preorder u encomienda o calandario levará de regalo una chapa de Radio La Granja y serán 7 €. Dimpués d’o 22 de noviembre, será bell euret mas.
#Escribir a emisoraradiolagranja@gmail.com y te contaremos cómo fer o tuyo pediu.


L’atra nueit salié a fer una gambada en suenios, a la luz d’a Luna. Como que ye habitual, no sabeba enta án m’encaminaban os míos trangos, asinas que me deixé levar. A nueit yera muit agradable, tasament i heba chent por a carrera y, quan querié dar-me cuenta, heba saliu de Ciudat Prisión y me trobaba en una enforcadura; en l’actualidat, son usurpadas por as grans superficies, y no se puede pronunciar a parola cruce en francés sin fer publicidat d’un supermercau. Ironicament, allí tenié o mío primer enfrontinazo d’a nueit, debant de yo se dibuixaba a fegura d’o dios Hermes, o d’os pietz alaus,mensachero d’os dioses y, cómo no, protector d’as crucillatas; de conchunta con Hecate, diosa d’os Infiernos, companyera de Hades. Por lo visto en l’Olimpo tamién yeran de confinamiento y le heban mandau a ell a por ambrosía. No querié afondar, pus a somardería no ye bella cosa que os dioses toleren masiau bien y, fendo-me o loco, coseta que no me resultó en esceso complicada, m’esculpé decindo-le que teneba una cita con o Diaple, u con Plutón, qué me sé yo.
-Asinas que voi a continar la marcha, a veyer si trobo bell cruce de camins sin centro comercial.

Dito y feito, reprenié o mía onirica promenada dica que, en un momento dau, arribé a una forcallo digna d’a millor leyenda d’o Delta d’o Mississippi. Me sentiba como Robert Johnson, asinas que m’aprecisé a quitar una guitarra d’a mía mochila y un taburete an posar-me. Consulté o mío reloch d’arena…as 12 d’a nueit, a Hora d’as Broixas, qué contrariedat. No me petaba entablar conversación con garra enchicera, encara conservo feridas ubiertas d’a zaguera vegada que tocé con una, asinas que abancé o cronometro dica as 3 d’a maitinada, l’Hora d’o Diaple, en contraposición a las 3 d’a tarde, hora en que suposadament murió Jesucristo.

Como que deciba, m’espolié a afinar a guitarra y, a l’aspera que se m’amaneixese Lord Sassafras, o Barón Samedi u, ves-te a saber, o Diaple Cojuelo, me disposé a tocar u, a lo menos apurriar o traste a la luz d’as incautas estrelas. Estió en ixe momento quan una voz de ultrafuesa s’endrezó a yo con vehemencia:
-Nino, Dragón, talla-te un poquet ixas unglas antes de tocar a guitarra, que la vas a estricallar. Por muito menos, en cruces de camín como iste enforcaban a la chent.
-No, si tampoco ye que saba tocar-la; en parte veniba por ixo.
Me quedé observando a uembra que cada vegada mas s’iba fendo visible debant de yo, una figura ixuta, de pelo radiu y mans aceradas…no podeba dar credito a os míos uellos, yera ell.
– Yes Paco de Lucía, exclamé enlucernau.
– Asinas ye, que asperabas, que se t’amaneixese Satán?, m’espetó mordazment.
– Hombre, bell demonio a qui vender a mía alma pa aprender a tocar a guitarra como…como que tu. Ye que la tiengo en guarencia…l’alma, no a guitarra.
-Imos a veyer, Dragón. Lo primer, pa qué quiere garra anchel u demonio a tuya alma? De tener-la, ye tuya y de creyer en l’infierno, pus quan mueras te la levarás con tu, u no?. Fixo no saben qué fer con tantas almas.
-Hombre, visto asinas, farfallé.
sentimiento-Y lo segundo, pa qué te sirve tocar a guitarra como que un virtuoso, si no tiens alma. Sin duende, solament serías un mico de repetición, sin sentimiento no transmitirías brenca.
– Bai hombre,dicié, y bell consello no podrías dar-me?
-Aprende a tecnica, practica muito y mete-le toda a tuya alma, ofeeling que dicen os anglos.
Y acto seguiu m’arrebató a guitarra y, sin mas, se metió a tocar-la fendo-la charrar, redir y plorar.
Una vegada habió rematau me la tornó y s’aluenyó, silenciosament, por an heba veniu. Yo, confuso, como que si hese visto a o diaple en persona, alcé escamilleta y guitarra en a mochila de nuevo y encaminé os míos trangos ent’o mío paúl. Una vegada plegau aquí, metié o traste en una vitrina, entre dos auguas, dica que aconsiga armar-me de valor y paciencia pa intentar tocar-lo, porque como que lo fació Paco de Lucía, soi de seguras que no l’aconseguiré nunca… Muere-te d’invidia, Robert Johnson…

Canasto y algodón/ Roscadero y cotón—————La Canalla

Putain de guèrre, Puta Guerra, Jaques Tardi y Jean Pierre Verney (2008)
A capacidat d’o ser humano pa acabar con os suyos semellants no conoixe limites, si bella cosa ha iu evolucionando en a historia ye a creyatividat pa inventar maquinas cada vegada mas eficaces con as qualas accelerar o proceso d’acotolar a atros sers humans.

Puta guerra ye a historia definitiva sobre a gran guerra, no recomendable pa totz os estamagos, fa que Carrerons de Gloria pareixca una comedia en comparanza. Aquí vivimos a bardoma, a muerte y a inchusticia d’a guerra como que nunca dinantes ha estau reflectada por garra atro autor o que la convierte en una lectura obligada pa totz y en un cómic indispensable.

Tardi s’ha imposau como que a gran referencia pa entender o que ocurrió en as trincheras d’a I Guerra Mundial. No ye un historiador, ni un autor de documentals, ni un novelista. Se tracta de Jacques Tardi (Valence, 1946), un debuxant de tebeos que, dende a suya casa d’o este de París, a unas garradas d’o fosal de Père-Lachaise, ha aconseguiu recreyar como dengún l’horror y l’absurdo d’o conflicto a traviés d’historias de poilus —”peludos” u “masclotz”, o nombre que recibiban os soldaus franceses.
L’1 de chinero de 2013 s’enteró que heba recibiu a maxima condecoración que atorga o Estau francés, a Lechión d’Honor. Dentro d’una antiga tradición d’a quala participan grans santons como Jean-Paul Sartre, Albert Camus u Simone de Beauvoir —Jacques Prévert dició d’iste premio: “Refusar a Lechión d’Honor ye muit bien, pero ye millor no haber-la mereixiu”—; Tardi declinó a medalla por no querer “recibir brenca, ni d’o poder actual ni de garra atro poder politico qualsiquiera que este sía“, y s’ha negau a participar en a commemoración d’o centenario d’o prencipio d’o conflicto, o escayecimiento de l’anyo en Francia, manimenos que recibió l’encargo d’elaborar un fresco.
Tardi atorga o protagonismo d’o filo argumental a un choven soldau francés reclutau a primers d’a guerra. As reflexions personals sobre o pasau, a correspondencia con a retaguarda, o companyerismo, y sobre tot, o espanto, se personifican en iste soldau, pero podrían fer-se extensibles a qualsiquiera d’os participants en a Gran Guerra, a l’uno y l’atro costau d’o frent. En ista ocasión, a diferencia d’a mayoría d’as suyas obras en as qualas l’uso d’o blanco y negro busca creyar un universo mas fosco y lugubre, as vinyetas s’inundan de color. Os chocants valons royos d’os uniformes franceses d’os primers anyos d’a guerra, as sayas escocesas u as trazas d’as tropas reclutadas en as colonias plegan mas fidelment que nunca a os uellos d’o lector. Iste punto constituye un d’os de mayor intrés d’a obra, ya que a mayoría d’os documentos graficos sobre iste conflicto son en blanco y negro, o que suposa bella “leixanía” con iste escayecimiento. Isto aconsigue a uellos d’o lector un mayor realismo, pero sin trestucar atros aspectos d’importancia como que a d’a creyación d’una atmosfera anguniosa y malaudiza, a solitut d’o campo de batalla, o sufrimiento u o espanto, que no se veyen metigaus ni un sacre. Unatro d’os aspectos a destacar ye que Puta Guerra no se centra solament en os campos de batalla sino que amuestra de qué forma en a retaguarda se vive o conflicto d’una traza muit distinta. A encorporación d’a muller a os treballos industrials, u a badanas vida d’os dirichents y capas mas acomodadas son tamién amostraus brillantement y cumple l’obchectivo d’amostrar a guerra como que un proceso muit diferenciau tanto cheograficament, en os frents y en a retaguarda, como que socialment, entre as capas socials elevadas y as mas desfavorexidas. O cómic ista vegada no viene solenco. Dimpués d’as mas de cient pachinas o lector trobará un completo dossier sobre o conflicto realizau por o documentalista y sociologo francés Jean Pierre Verney. L’orden cronolochico usau por se reproduz d’igual traza en iste apartau en o qual s’aporta o conteniu de caracter mas purament historiografico d’a obra. O material fotografico aquí emplegau ye amplio y brillant, a o que cal sumar a encertada sintesi historica sobre o conflicto, constituindo d’ista forma un complemento ideyal pa que a obra quede zarrada.

War—————————–Edwin Starr (3:22)

“Cada detalle ye muit important porque os obchectos nos contan a guerra”, asegura Tardi. O suyo cudiau d’o detalle ye obsesivo, y chunto a o suyo colaborador, l’investigador Jean-Pierre Verney, con o qual co-sinyaa Puta guerra, han feito abanzar a comprensión d’o que ocurrió en o Frent Occidental entre 1914-1918 y d’os sufrimientos que padeixioron os soldaus. “Muit poca chent sabe que en l’equipo que s’entregaba a os uniformaus franceses a o prencipio d’a guerra no i heba pedaletas. No ye dificil imachinar o que unas botas de cuero duro nuevas feban con os suyos pietz en pleno verano. No dentroron en l’uniforme reglamentario dica 1915. Ye criminal”.
Tardi leva 40 anyos treballando sobre o tema, dende que, fa 40 anyos, le ofrió una historieta a Goscinny pa la revista Pilote que o creyador d’Astérix y Obélix le refusó. “Charrar alavez d’ista guerra yera mincho meter en dubda a os veteranos que hebanos visto cada anyo l’11 de noviembre”, explica.
“Cal verificar-lo tot; si no, no se puede dibuixar, y en ixo ye esencial Verney. En primeras he de decir que no ye historiador y a oshistoriadors oficials no les fa goyo que sía citau como que tal. Ye documentalista, un tipo que dende nino recorreba os campos de batalla. Empecipió a coleccionar cosetas. Y dende a salida d’a guerra d’as trincheras, se metió en contacto con yo pa decir-me que i heba detalles que yeran mal y que podeba aduyar-me. Me charraba d’una colección con muito material. A o prencipio tenié bastants recelos porque imachinaba a un loco d’as armas, pero me podió a curiosidat. No cayié sobre un obseso de las armas, sino sobre belún que abordaba a guerra como que yo”, explica Tardi, qui torna a insistir sobre a importancia que concede a cada detalle. “Os pantalons royos d’os uniformes franceses a o prencipio d’a guerra nos contan una historia: ninviabanos a ixos chovens a o frent con una color que se veyeba perfectament. Tenebanos un exercito con o qual querebanos ganar una guerra, pero no empecipiamos muit bien que se diga. Cal denunciar tot isto y por ixo cal estudiar os obchectos. Si se mira, por eixemplo, l’equipo pa minchar, se descubre que ye muito pior que o d’os alemans. Unatro obchecto important yera o limpiaculos, una pala de fusta que utilizaban os soldaus porque, naturalment, no i heba paper en as trincheras”.
“Si tiengo una seqüencia con una metralladera, Verney la traye y la metemos sobre a mesa. Muito millor que una fotografía. Pero no se para astí, porque cal saber cómo funcionaba, cómo s’emparaba, que feba falta augua pa enfriar-la, án teneba as municions. Alavez me traye o manual de mantenimiento”, sinyala antes de lanzar una nueva diatriba a favor d’o treballo de documentación a cuenta de Carrerons de gloria. “Soi d’alcuerdo con o fondo, claro, pero a cinta ye plena d’errors: as trincheras no yeran asinas, son masiau amplas. O castiello an se celebra o consello de guerra ye d’estilo barroco bavaro porque o film ye rodau en Alemanya. Y los afusiles son rusos. Me dicen que son cosetas d’as qualas solament me doi cuenta yo, pero son importants. No veigo en qué a documentación sería mala pa la cinta”.
A suya obra y a suya conversación son una mina d’información sobre o conflicto. “Empecipioron entre aquella guerra os bombardios contra civils, gracias a os zepelines, pero tamién a l’artillería”, explica antes de dibuixar una de las armas alemanas mas potents: un canyón chigant que 100 hombres operaban sobre radiles. Disparaban contra obchectivos situaus a 100 kilometros y o proyectil quasi dentraba en orbita. “Plegoron a aconseguir l’Île de la Cité”, sinyala. Os plans estioron destruius y nunca se troboron, como que tampoco amaneixioron restas d’o canyón. Un incheniero canadiense plegó a reconstruir-los. “Pero amaneixió muerto en un hotel d’Oriente Próximo. Una d’as hipotesis ye que estió asasinau por o Mosad porque pretendeba vender os plans a Sadam Husein”, sinyala.

La puta guerra————————-Ixuquera (3:39)

A Iª Guerra Mundial ye infinita, pero sobre tot ye infinito o dolor que causó un d’os momentos mas absurdos y sangrientos d’a historia d’a humanidat. A la fin d’a guerra d’as trincheras recuerda as zifras: 35 países contendients, 10 millons de muertos, 70 millons de combatents. “Quántos ferius? Quántas viudas? Quántos uerfans?”. Entre as fuesas d’Edith Piaf, Yves Montand u Jim Morrison d’o Père-Lachaise, siempre con flors y mensaches, o vesitantz se troba con un chicot mausoleu, muito mas discreto, en o qual puede leyer-se: “Doctor Ponroy. Medico des gueules cassées”, as “caras rotas”, que Tardi ha dibuixau con un realismo estremoleixiu en una serie de planchas de Puta guerra. Simbolizan os dos aspectos opuestos d’o progreso en a I Guerra Mundial: por un costau, nuevas armas, nuevos gases capaces de provocar mas muertos, feridas mas profundas y dolorosas (no cal ixuplidar que l’obchectivo d’un arma de guerra ye ferir mas que matar, porque un muerto se deixa dezaga y un feriu retarda un Exercito), y por unatro costau, extraordinarios abances en a medicina que permitioron salvar a muitos hombres que quedoron horriblement esfeguraus. Se calcula que tornoron a Francia entre 10.000 y 15.000 gueules cassées. A lotería nacional francesa estió creyada pa tractar d’aduyar-les en 1933. “Represientan l’eixemplo maximo d’os quals no tornoron indemnes. No murioron, pero tornoron con un aspecto terrorifico. Los amagoron, sentibanos vergüenya d’ixa chent a la quala, manimenos, hebanos ninviau a o frent. En a mayoría d’os casos, as suyas mullers les abandonoron. Yeran en institucions, muitos acaboron en a carrera”, explica Tardi.

Un afer que estudeya a fondo en a suya obra son os afusilaus pa dar eixemplo. Francia estió o país que mas soldaus ninvió a o paretón por negar-se a luitar debant de l’enemigo entre a Gran Guerra: 740, que encara no han estau re-habilitaus de forma colectiva. “Entre os afusilaus i heba muitos que s’heban negau a combatir, acusaus d’amotinar-se, encara que no ye un termin exacto. Creigo que a parola correcta ye huelga porque no refusaban combatir. O que refusaban yera combatir en as circumstancias en as qualas yeran, a las ordens d’oficials inutils”.

Tardi relata en Puta guerra as rebelions que estalloron dimpués d’a desastrosa ofensiva que planificó o cheneral Nivelle conoixida como que a Batalla d’o Camín d’as Damas (Kubrick s’inspiró d’iste episodio en Carrerons de gloria). “Nivelle yera un incapaz y a sola ideya que se le ocurre ye lanzar oleadas d’ataques sin garra resultau. Si un va sobre o terreno, se constata que yera imposible: os franceses heban de puyar una cuesta muit elevada, quan tiraban mengranas cayeban sobre ells. Tenemos alavez a os soldaus que se negaban a combatir, pero tamién s’afusiloron asasins, crebantadors, criminals. O que diz o Gubierno ye que son disposaus a re-habilitar-los, pero caso por caso. Pero os fichers han desapareixiu”.

Alavez surte una pregunta que s’heba quedau en a libreta: a influencia de Goya, sobre tot por a imachen d’un cuerpo estricallau sobre un arbol que recuerda a l’entochau d’os Desastres d’a guerra. “Qualsiquiera que dibuixe a guerra ye influiu por Goya, diz, pero ixa imachen la prenié d’una fotografía”.

They just want war/ Ells o que quieren ye guerra—————–Mindforce (2:43)Y dica a quí o programa de hue. Nos ascuitamos en a Radio, nos veyemos en os Suenios…Salut!!!!


Baby please don’t go/ Chiqueta, por favor, no vaigas—————-The Yardbirds (2:42)

Responder

Introduce tus datos o haz clic en un icono para iniciar sesión:

Logo de WordPress.com

Estás comentando usando tu cuenta de WordPress.com. Cerrar sesión /  Cambiar )

Google photo

Estás comentando usando tu cuenta de Google. Cerrar sesión /  Cambiar )

Imagen de Twitter

Estás comentando usando tu cuenta de Twitter. Cerrar sesión /  Cambiar )

Foto de Facebook

Estás comentando usando tu cuenta de Facebook. Cerrar sesión /  Cambiar )

Conectando a %s

Este sitio usa Akismet para reducir el spam. Aprende cómo se procesan los datos de tus comentarios .